ભારતની ટીમે વર્લ્ડ કપમાં વિશ્વ વિજેતા બન્યા બાદ દિલ્હીમાં વડાપ્રધાન નરેન્દ્ર મોદી સાથે કરી ખાસ મુલાકાત તમામ ખેલાડીઓ એ શેર કર્યા પોતાના અંગત અનુભવ જુઓ વાયરલ તસવીરો
ટી ટ્વેન્ટી વર્લ્ડ કપ વિશ્વ વિજેતા ટીમ ઇન્ડિયાનું દિલ્હીમાં ભવ્ય સ્વાગત કરવામાં આવ્યું હતું જેમાં ટીમ ઇન્ડિયા સૌપ્રથમ ભારતના યશસ્વી વડાપ્રધાન નરેન્દ્ર મોદી સાથે મુલાકાત કરવા માટે પહોંચી હતી જેની અનેક તસવીરો સોશિયલ મીડિયામાં ખૂબ જ વાયરલ થઈ રહી છે. આપણે સૌ લોકો જાણીએ છીએ કે ટી20 વર્લ્ડ કપ માં ભારત સાઉથ આફ્રિકા સામે જીતતાની સાથે જ નરેન્દ્ર મોદીએ સોશિયલ મીડિયાના માધ્યમ દ્વારા સમગ્ર ટીમ ઇન્ડિયાને શુભકામના અને શુભેચ્છા પાઠવી હતી. ભારતની ટીમે 2024 t20 વર્લ્ડ કપમાં રોહિત શર્માની કેપ્ટનસી હેઠળ સાત રન થી સાઉથ આફ્રિકા સામે વિશ્વવિજેતા બન્યું હતું. જેની સમગ્ર દેશભરમાં ખૂબ જ ધામધૂમથી ઉજવણી કરવામાં આવી હતી.
આ બાદ ટીમ ઇન્ડિયા વહેલી સવારે પોતાની ટીમ અને વર્લ્ડ કપ સાથે દિલ્હી પહોંચી હતી જ્યાં વડાપ્રધાન નરેન્દ્ર મોદી સાથે તમામ ખેલાડીઓએ મુલાકાત કરી જીતની ઉજવણીને ખાસ બનાવી હતી. ભારતની ટીમના તમામ ખેલાડીઓ એ વર્લ્ડ કપ દરમિયાન થયેલા પોતાના અનુભવ વડાપ્રધાન નરેન્દ્ર મોદી સાથે વ્યક્ત કર્યા હતા. સોશિયલ મીડિયામાં એક થી બે મિનિટ નો વિડીયો વાયરલ થઈ રહ્યો છે. જેમાં ટીમ ઇન્ડિયાના તમામ ખેલાડીઓ નરેન્દ્ર મોદીની આસપાસ વર્તુળાકાર કરીને બેઠા છે. નરેન્દ્ર મોદીની ડાબી બાજુ ટીમ ઇન્ડિયાના કેપ્ટન રોહિત શર્મા અને જમણી બાજુ તેમના કોચ રાહુલ દ્રવિડ જોવા મળ્યા હતા.
તમામ ખેલાડી ઇન્ડિયા ચેમ્પિયન્સ લખેલી બ્લુ જર્સીમાં જોવા મળ્યા હતા. આ માત્ર જર્સી નહિ પરંતુ ટીમ ઇન્ડિયા માટે તેમની જીતનું એક પ્રતીક બની ગયું હતું. સમગ્ર ટીમ ઇન્ડિયા વડાપ્રધાન નરેન્દ્ર મોદી સાથે ખૂબ જ નજીકથી જોડાયેલી હોય તેવું લાગતું હતું. આ ખાસ મુલાકાત દરમિયાન ભારતીય ક્રિકેટ કંટ્રોલ બોર્ડ (BCCI)ના પ્રમુખ રોજર બિન્ની અને સેક્રેટરી જય શાહે વડાપ્રધાન મોદીને ટીમ ઈન્ડિયાની કસ્ટમાઈઝ્ડ જર્સી આપી. તેમાં નમો લખેલું હતું અને એક નંબર પણ દર્શાવવામાં આવ્યો હતો. પ્રધાનમંત્રી નરેન્દ્ર મોદીએ ટીમ ઇન્ડિયાના ખેલાડીઓ સાથે સમગ્ર બીસીસીઆઈ નો આભાર વ્યક્ત કર્યો હતો અને આ મુલાકાતને ખાસ બનાવી દીધી હતી.
આપણે સૌ લોકો જાણીએ છીએ કે 2023 ઓડીઆઇ વર્લ્ડ કપમાં ભારત ઓસ્ટ્રેલિયા સામે હારતાની સાથે જ નરેન્દ્ર મોદી તુરંત ખેલાડીઓને મળવા માટે પહોંચ્યા હતા અને ખેલ પ્રત્યે જુસ્સો આપ્યો હતો. આ બાદ જ્યારે હવે ટીમ ઇન્ડિયા પોતાની મહેનત સંઘર્ષ અને આત્મવિશ્વાસને કારણે t20 વર્લ્ડ કપમાં વિજેતા બની હતી ત્યારે પ્રધાનમંત્રી નરેન્દ્ર મોદીએ તમામ ખેલાડીઓને શુભકામના પાઠવી હતી તથા દરેક લોકો સાથે ફોટોગ્રાફી કરી પરિવાર સાથે મુલાકાત કરી હતી. આબાદ ટીમ ઇન્ડિયાએ મુંબઈમાં ઓપન બસમાં લોકો સાથે જીતની ઉજવણી કરી હતી. જેની તસવીરો સોશિયલ મીડિયામાં ખૂબ જ વાયરલ થઈ રહી છે.
